बर्दवान रोड आरओबी उद्घाटनले सिलगढीको यातायातमा नयाँ गति, उत्तर बङ्गालमा पूर्वाधार विकास तीव्र: सांसद राजु बिष्ट
सिलगढी, २७ जुलाई: सिलगढीको एयरभ्यु मोड र झन्कार मोडलाई जोड्ने बर्दवान रोडस्थित नवनिर्मित रोड ओभर ब्रिज (ROB) को उद्घाटन पश्चिम बङ्गालका मुख्यमन्त्री सुवेन्दु अधिकारीको उपस्थितिमा सम्पन्न भएको छ। कार्यक्रममा दार्जिलिङका सांसद राजु बिष्ट पनि सहभागी भएका थिए।
उद्घाटनपछि सांसद राजु बिष्टले केन्द्र सरकारले यस परियोजनाका लागि ₹६८.७५ करोड विनियोजन गरे पनि अघिल्लो राज्य सरकारले करिब एक दशकसम्म काम सम्पन्न गर्न नसक्दा सर्वसाधारणले सास्ती बेहोर्नुपरेको बताए। मुख्यमन्त्री सुवेन्दु अधिकारीको पहलमा यो लामो समयदेखि रोकिएको परियोजना तीव्र रूपमा सम्पन्न भएकोमा उनले धन्यवाद व्यक्त गरे।
उनका अनुसार नयाँ आरओबी सञ्चालनमा आएपछि सिलगढीको यातायात व्यवस्थापनमा सुधार आउने, यात्रा समय घट्ने, सडक सुरक्षा बढ्ने तथा स्थानीय बासिन्दा, विद्यार्थी, श्रमिक, व्यापारी, पर्यटक र आकस्मिक सेवाका सवारीसाधनलाई सहज आवागमनमा ठूलो राहत पुग्नेछ।
सांसद बिष्टले प्रधानमन्त्री नरेन्द्र मोदी र मुख्यमन्त्री सुवेन्दु अधिकारीको नेतृत्वमा उत्तर बङ्गालमा पूर्वाधार विकासले तीव्र गति लिएको उल्लेख गर्दै बागडोगरा विमानस्थल विकास, एनजेपी रेलवे स्टेशन आधुनिकीकरण, सिलगढी एलिभेटेड हाईवे, एनएच–७१७ए, जलढाका–बिन्दु राजमार्ग, सिलगढी रिङ रोड, कोरोनेशन ब्रिजको वैकल्पिक छ लेन सडक, दार्जिलिङको वैकल्पिक राजमार्ग, दार्जिलिङ–लेबोङ–थर्ड माइल सर्कुलर रोड, माटीगढा–मिरिक सडक सुधार, रोहिणी सडक स्तरोन्नति तथा गोरखपुर–सिलगढी एक्सप्रेसवे जस्ता परियोजनाहरू कार्यान्वयन वा योजनाको चरणमा रहेको जानकारी दिए।
यी परियोजनाले दार्जिलिङ पहाड, तराई, डुवर्स तथा सिलगढी क्षेत्रमा यातायात सञ्जाल विस्तार, ट्राफिक व्यवस्थापन, पर्यटन प्रवर्द्धन, व्यापार विस्तार तथा रोजगारीका अवसर सिर्जना गर्न महत्त्वपूर्ण भूमिका खेल्ने विश्वास उनले व्यक्त गरेका छन्।
